Íslenskar orkurannsóknir, ÍSOR, eru sérstök ríkisstofnun sem heyrir undir iðnaðarráðuneytið.
Hlutverk ÍSOR er að vinna að verkefnum og rannsóknum á sviði náttúrufars, orkumála og annarra auðlindamála. Íslenskar orkurannsóknir starfa á viðskiptalegum grundvelli á samkeppnismarkaði og afla sér tekna með sölu á rannsóknum, ráðgjöf, þjónustu og upplýsingum eða öðrum verkefnum á starfsviði Íslenskra orkurannsókna.
ÍSOR varð til þegar Orkustofnun var skipt upp árið 2003, en þá var rannsóknasvið stofnunarinnar skilið frá stjórnsýsluhluta hennar (sjá grein í Morgunblaðinu).
ÍSOR hefur yfir að ráða margvíslegum gögnum um íslenskar orku- og umhverfisauðlindir, s.s. jarðhita, vatnsorku, hafsbotn, neysluvatn og margvíslega jarðfræðikortlagningu.